duniya se kabhi hum ko nibhana nahin aaya

duniyā se kabhī ham ko nibhānā nahīñ aayā

phir ham se nibhāne ko zamāna nahīñ aayā

ḳhud se kiyā vā'da bhī nibhānā nahīñ aayā

aanā hī na thā ham ko na aanā nahīñ aayā

kyoñ rakhte ho ummīd manā leñge tumheñ ham

ham se to kabhī ḳhud ko manānā nahīñ aayā

sunte haiñ ki har shaḳhs ko miltī hai mohabbat

hisse meñ hamāre ye ḳhazāna nahīñ aayā

vo daur bhī guzrā hai jahāñ ruk sī ga.ī thī

phir ḳhud se hī milne kā zamāna nahīñ aayā

un ko ye batānā thā hameñ pyaar nahīñ hai

milne pe vahī ham ko batānā nahīñ aayā

bāzār sī raunaq to banā lī thī pa un ko

ghar pyaar mohabbat se sajānā nahīñ aayā

duniya se kabhi hum ko nibhana nahin aaya

phir hum se nibhane ko zamana nahin aaya

KHud se kiya wa'da bhi nibhana nahin aaya

aana hi na tha hum ko na aana nahin aaya

kyon rakhte ho ummid mana lenge tumhein hum

hum se to kabhi KHud ko manana nahin aaya

sunte hain ki har shaKHs ko milti hai mohabbat

hisse mein hamare ye KHazana nahin aaya

wo daur bhi guzra hai jahan ruk si gai thi

phir KHud se hi milne ka zamana nahin aaya

un ko ye batana tha hamein pyar nahin hai

milne pe wahi hum ko batana nahin aaya

bazar si raunaq to bana li thi pa un ko

ghar pyar mohabbat se sajaana nahin aaya