duniya se pare jism ke is bab mein aae

duniyā se pare jism ke is baab meñ aa.e

ham ḳhud se judā ho ke tire ḳhvāb meñ aa.e

kuchh aise bhī hamvār kī har sat.h ko apnī

maujoñ kī tarah ham tire pāyāb meñ aa.e

un ko bhī abad ke kisī sāhil pe utāro

vo lams jo is raat ke sailāb meñ aa.e

ik naqsh to Thahrā thā ravānī ke badan par

jab ban ke bhañvar ham tire girdāb meñ aa.e

bikhrāo ke shahpar pe ham utre pe zamīñ par

kuchh phail ke is nuqta-e-nāyāb meñ aa.e

the ġhaib ke teshe se tarāshe hue ham tab

añgḌā.ī kī sūrat tirī mehrāb meñ aa.e

duniya se pare jism ke is bab mein aae

hum KHud se juda ho ke tere KHwab mein aae

kuchh aise bhi hamwar ki har sath ko apni

maujon ki tarah hum tere payab mein aae

un ko bhi abad ke kisi sahil pe utaro

wo lams jo is raat ke sailab mein aae

ek naqsh to Thahra tha rawani ke badan par

jab ban ke bhanwar hum tere girdab mein aae

bikhrao ke shahpar pe hum utre pe zamin par

kuchh phail ke is nuqta-e-nayab mein aae

the ghaib ke teshe se tarashe hue hum tab

angDai ki surat teri mehrab mein aae