duniya to ye kahti hai qatil hain teri aankhen

duniyā to ye kahtī hai qātil haiñ tirī āñkheñ

maiñ kahtā huuñ hastī kā hāsil haiñ tirī āñkheñ

in se bhī mohabbat ke paiġhām hameñ pahuñche

paiġhām-rasānoñ meñ shāmil haiñ tirī āñkheñ

ehsās se jis ke ham gardan na uThā paa.e

us lutf-e-farāvāñ kī hāmil haiñ tirī āñkheñ

āñkheñ haiñ tirī saaqī sāġhar mai-e-irfāñ ke

hoñToñ se lagāne ke qābil haiñ tirī āñkheñ

bhāloñ se murassa' haiñ ārāsta tīroñ se

har dil se ulajhne par maa.il haiñ tirī āñkheñ

nazroñ meñ tirī aa kar āñkhoñ meñ samā jā.ūñ

rāheñ haiñ tirī nazreñ manzil haiñ tirī āñkheñ

duniyā-e-tamannā kā nāpaid kināra hai

is bahr-e-farāvāñ meñ sāhil haiñ tirī āñkheñ

maano to ḳhatā bhī hai be-parda tujhe dekhā

varna to in āñkhoñ meñ shāmil haiñ tirī āñkheñ

ai dost in āñkhoñ meñ duniyā bhī hai 'uqbā bhī

achchhā hai 'shifā' par bhī maa.il haiñ tirī āñkheñ

duniya to ye kahti hai qatil hain teri aankhen

main kahta hun hasti ka hasil hain teri aankhen

in se bhi mohabbat ke paigham hamein pahunche

paigham-rasanon mein shamil hain teri aankhen

ehsas se jis ke hum gardan na uTha pae

us lutf-e-farawan ki hamil hain teri aankhen

aankhen hain teri saqi saghar mai-e-irfan ke

honTon se lagane ke qabil hain teri aankhen

bhaalon se murassa' hain aarasta tiron se

har dil se ulajhne par mail hain teri aankhen

nazron mein teri aa kar aankhon mein sama jaun

rahen hain teri nazren manzil hain teri aankhen

duniya-e-tamanna ka napaid kinara hai

is bahr-e-farawan mein sahil hain teri aankhen

mano to KHata bhi hai be-parda tujhe dekha

warna to in aankhon mein shamil hain teri aankhen

ai dost in aankhon mein duniya bhi hai 'uqba bhi

achchha hai 'shifa' par bhi mail hain teri aankhen