durd pi lete hain aur dagh pacha jate hain

durd pī lete haiñ aur daaġh pachā jaate haiñ

yaañ balā-nosh haiñ jo aa.e chaḌhā jaate haiñ

dekh kar tum ko kahīñ duur ga.e ham lekin

Tuk Thahar jaao to phir aap meñ aa jaate haiñ

jab talak paañv meñ chalne kī hai tāqat baaqī

hāl-e-dil aa ke kabhū tujh ko dikhā jaate haiñ

ishq kā kyūñki butāñ se kare iḳhfā koī

Dhab se nazroñ meñ ye kāfir vahīñ pā jaate haiñ

tarah sozan kī jo haiñ rishta-e-ulfat meñ phañse

jis taraf sair kareñ rū-ba-qazā jaate haiñ

kaun ho ġhuncha-sifat apne sabā kā marhūn

jaise tañg aa.e the vaise hī ḳhafā jaate haiñ

rahiyo hushiyār tū lap-jhap se butāñ kī 'qā.em'

baat kī baat meñ vaañ dil ko uḌā jaate haiñ

durd pi lete hain aur dagh pacha jate hain

yan bala-nosh hain jo aae chaDha jate hain

dekh kar tum ko kahin dur gae hum lekin

Tuk Thahar jao to phir aap mein aa jate hain

jab talak panw mein chalne ki hai taqat baqi

haal-e-dil aa ke kabhu tujh ko dikha jate hain

ishq ka kyunki butan se kare iKHfa koi

Dhab se nazron mein ye kafir wahin pa jate hain

tarah sozan ki jo hain rishta-e-ulfat mein phanse

jis taraf sair karen ru-ba-qaza jate hain

kaun ho ghuncha-sifat apne saba ka marhun

jaise tang aae the waise hi KHafa jate hain

rahiyo hushiyar tu lap-jhap se butan ki 'qaem'

baat ki baat mein wan dil ko uDa jate hain