dushman-e-jaan ke liye lafz-e-masiha nikla

dushman-e-jāñ ke liye lafz-e-masīhā niklā

sach mire muñh se to niklā magar aadhā niklā

dahr meñ jis kā sharar aag se aage hai kahīñ

kaisī miTTī hai ye jis se tirā banda niklā

us ne jaate hue bas itnā kahā jaatā huuñ

mere hoñToñ se faqat haule se achchhā niklā

dekh to kaise chhalak kar tirī jānib lapkā

tere hoñToñ kā to ye jaam bhī pyāsā niklā

ik hasīñ ne mirī taqdīr badal Daalī hai

maiñ jise chāñd samajhtā thā sitāra niklā

tū ne dekhā hī nahīñ zulm kiyā hai mujh par

dil se īmān-o-yaqīñ saare kā saarā niklā

vo imārat sī girī thī jo mire siine meñ

us kī buniyād se kahte haiñ dafīna niklā

aisā kyā tū ne kiyā thā ki tirī mahfil se

mar gayā mar gayā har shaḳhs ye kahtā niklā

ishq pā.inda o raḳhshanda vafā zindabād

aap ko dekh ke be-sāḳhta na.ara niklā

dekh to rang bhī tasvīr se bichhḌe hue haiñ

aur tujh se bhī to apnā yahī rishta niklā

dushman-e-jaan ke liye lafz-e-masiha nikla

sach mere munh se to nikla magar aadha nikla

dahr mein jis ka sharar aag se aage hai kahin

kaisi miTTi hai ye jis se tera banda nikla

us ne jate hue bas itna kaha jata hun

mere honTon se faqat haule se achchha nikla

dekh to kaise chhalak kar teri jaanib lapka

tere honTon ka to ye jam bhi pyasa nikla

ek hasin ne meri taqdir badal Dali hai

main jise chand samajhta tha sitara nikla

tu ne dekha hi nahin zulm kiya hai mujh par

dil se iman-o-yaqin sare ka sara nikla

wo imarat si giri thi jo mere sine mein

us ki buniyaad se kahte hain dafina nikla

aisa kya tu ne kiya tha ki teri mahfil se

mar gaya mar gaya har shaKHs ye kahta nikla

ishq painda o raKHshanda wafa zindabaad

aap ko dekh ke be-saKHta nara nikla

dekh to rang bhi taswir se bichhDe hue hain

aur tujh se bhi to apna yahi rishta nikla