dushman-e-jaan se dushmani bhi nahin

dushman-e-jāñ se dushmanī bhī nahīñ

jān-e-jānāñ se dostī bhī nahīñ

ye taġhāful hai ye tajāhul hai

sach to ye hai ki sādgī bhī nahīñ

kuchh añdherā hai kuchh ujālā hai

tīrgī hai ki tīrgī bhī nahīñ

ik lagāvaT sī un se hai lekin

aisī kuchh rasm-e-āshiqī bhī nahīñ

us kā insāniyat se kyā rishta

jo haqīqat meñ aadmī bhī nahīñ

tum se qaa.em hai shā.erī kā bharam

tum nahīñ ho to shā.erī bhī nahīñ

tere dāman meñ zindagī kī bahār

mere dāman meñ ik kalī bhī nahīñ

ham kahāñ jaa.eñ kaun hai apnā

saath jab apnī bekasī bhī nahīñ

rah ga.ī thī qalandarī 'hasrat'

āj-kal vo qalandarī bhī nahīñ

dushman-e-jaan se dushmani bhi nahin

jaan-e-jaanan se dosti bhi nahin

ye taghaful hai ye tajahul hai

sach to ye hai ki sadgi bhi nahin

kuchh andhera hai kuchh ujala hai

tirgi hai ki tirgi bhi nahin

ek lagawaT si un se hai lekin

aisi kuchh rasm-e-ashiqi bhi nahin

us ka insaniyat se kya rishta

jo haqiqat mein aadmi bhi nahin

tum se qaem hai shaeri ka bharam

tum nahin ho to shaeri bhi nahin

tere daman mein zindagi ki bahaar

mere daman mein ek kali bhi nahin

hum kahan jaen kaun hai apna

sath jab apni bekasi bhi nahin

rah gai thi qalandari 'hasrat'

aaj-kal wo qalandari bhi nahin