dushman ke sath dost bhi shishon ke ghar mein tha

dushman ke saath dost bhī shīshoñ ke ghar meñ thā

lekin maiñ dasht-o-koh pe paiham safar meñ thā

yuuñ dekhne meñ duur se har shai thī dil-nashīñ

ik dard sā basā huā shām-o-sahar meñ thā

mahfil meñ apne aap se ham pūchhte rahe

kis kā lahū makān ke dīvār-o-dar meñ thā

ye sach hai tere aane se mausam badal gayā

varna baḌā jumūd sā ahl-e-nazar meñ thā

TuuTā huā thā vāqa.ī andar se aadmī

tāroñ ko toḌ laane kā saudā to sar meñ thā

'mas.ūd' raat kaaT ke sāġhar ke daur meñ

shaiḳhoñ ke saath saath vo allah ke ghar meñ thā

dushman ke sath dost bhi shishon ke ghar mein tha

lekin main dasht-o-koh pe paiham safar mein tha

yun dekhne mein dur se har shai thi dil-nashin

ek dard sa basa hua sham-o-sahar mein tha

mahfil mein apne aap se hum puchhte rahe

kis ka lahu makan ke diwar-o-dar mein tha

ye sach hai tere aane se mausam badal gaya

warna baDa jumud sa ahl-e-nazar mein tha

TuTa hua tha waqai andar se aadmi

taron ko toD lane ka sauda to sar mein tha

'masud' raat kaT ke saghar ke daur mein

shaiKHon ke sath sath wo allah ke ghar mein tha