dushman ki dushmani ka safar kar raha hun main

dushman kī dushmanī kā safar kar rahā huuñ maiñ

ik umr āgahī kā safar kar rahā huuñ maiñ

phūloñ ko chhoḌ kar huuñ maiñ kāñToñ pe aa gayā

yuuñ dil kī bandagī kā safar kar rahā huuñ maiñ

niklā huuñ apne dil ke parinde ko DhūñDne

ya.anī ki zindagī kā safar kar rahā huuñ maiñ

dariyā se ruḳh badal ke yuuñ lab-soḳhta kahīñ

jangal meñ tishnagī kā safar kar rahā huuñ maiñ

har pal lahū kī aañch pe kāġhaz ko gholnā

yuuñ dasht-e-shā.erī kā safar kar rahā huuñ maiñ

ḳhud jī rahā huuñ jaane maiñ kitne ġhamoñ ke saath

bas ik tirī ḳhushī kā safar kar rahā huuñ maiñ

ik dil ne mere dil ko hai luuTā jahān se

ik dil kī dilbarī kā safar kar rahā huuñ maiñ

din garmī-e-jahān kī ḳhātir ḳhafā rahā

rātoñ ko raushnī kā safar kar rahā huuñ maiñ

dushman ki dushmani ka safar kar raha hun main

ek umr aagahi ka safar kar raha hun main

phulon ko chhoD kar hun main kanTon pe aa gaya

yun dil ki bandagi ka safar kar raha hun main

nikla hun apne dil ke parinde ko DhunDne

yani ki zindagi ka safar kar raha hun main

dariya se ruKH badal ke yun lab-soKHta kahin

jangal mein tishnagi ka safar kar raha hun main

har pal lahu ki aanch pe kaghaz ko gholna

yun dasht-e-shaeri ka safar kar raha hun main

KHud ji raha hun jaane main kitne ghamon ke sath

bas ek teri KHushi ka safar kar raha hun main

ek dil ne mere dil ko hai luTa jahan se

ek dil ki dilbari ka safar kar raha hun main

din garmi-e-jahan ki KHatir KHafa raha

raaton ko raushni ka safar kar raha hun main