dushman ko le ke sath sitamgar idhar baDha

dushman ko le ke saath sitamgar idhar baḌhā

kuch dard-e-sar ghaTā thā ki dard-e-jigar baḌhā

ḳhālī na aa.e yaar kī mahfil se ham kabhī

rashk-e-adū se aur bhī zaḳhm-e-jigar baḌhā

tanhā.ī par mirī na zarā bhī kiyā ḳhayāl

dil pahle nazr le liyā tab nāma-bar baḌhā

mahrūm rah na jaa.eñ ki mahfil aḳhīr hai

saaqī bhalā ho ab bhī koī jaam idhar baḌhā

mere sabab se qātil-e-ālam milā ḳhitāb

jab maiñ miTā to aap kā ye karr-o-far baḌhā

jab mar ga.e to qabr pe vo fātiha ko aa.e

kab mere nāla-hā-e-darūñ kā asar baḌhā

armān-e-vasl karte haiñ dekhūñ kahāñ qiyām

dil kī taraf bhī yaar kā tīr-e-nazar baḌhā

ranj-o-malāl-e-hijr se ghabrā na ai 'haqīr'

haañ jis qadar baḌhe abhī zād-e-safar baḌhā

dushman ko le ke sath sitamgar idhar baDha

kuch dard-e-sar ghaTa tha ki dard-e-jigar baDha

KHali na aae yar ki mahfil se hum kabhi

rashk-e-adu se aur bhi zaKHm-e-jigar baDha

tanhai par meri na zara bhi kiya KHayal

dil pahle nazr le liya tab nama-bar baDha

mahrum rah na jaen ki mahfil aKHir hai

saqi bhala ho ab bhi koi jam idhar baDha

mere sabab se qatil-e-alam mila KHitab

jab main miTa to aap ka ye karr-o-far baDha

jab mar gae to qabr pe wo fatiha ko aae

kab mere nala-ha-e-darun ka asar baDha

arman-e-wasl karte hain dekhun kahan qiyam

dil ki taraf bhi yar ka tir-e-nazar baDha

ranj-o-malal-e-hijr se ghabra na ai 'haqir'

han jis qadar baDhe abhi zad-e-safar baDha