dushman mere pichhe hai to dariya mere aage

dushman mire pīchhe hai to dariyā mire aage

ab koī bachā hī nahīñ rasta mire aage

tauhīn na kar tū mirī ġhurbat kī sar-e-ām

mat pheñk hiqārat se ye sikka mire aage

maiñ sach kā taraf-dār thā vo jhuuT kā haamī

tā-der bhalā kaise Thahartā mire aage

ghere haiñ abhī mujh ko zamāne ke masā.il

mat chheḌ abhī ishq kā qissa mire aage

ehsān kiyā jis pe usī ne mujhe luuTā

lo aa gayā nekī kā natīja mire aage

ai vaqt ke munsif ye tujhe zeb nahīñ hai

mat paḌh kisī zālim kā qasīda mire aage

duniyā-e-mohabbat kā maiñ darvesh huuñ yaaro

ik roz jhukegā ye zamāna mire aage

taslīm karūñ kaise bhalā us kī baḌā.ī

'tābish' to huā hai abhī paidā mire aage

dushman mere pichhe hai to dariya mere aage

ab koi bacha hi nahin rasta mere aage

tauhin na kar tu meri ghurbat ki sar-e-am

mat phenk hiqarat se ye sikka mere aage

main sach ka taraf-dar tha wo jhuT ka hami

ta-der bhala kaise Thaharta mere aage

ghere hain abhi mujh ko zamane ke masail

mat chheD abhi ishq ka qissa mere aage

ehsan kiya jis pe usi ne mujhe luTa

lo aa gaya neki ka natija mere aage

ai waqt ke munsif ye tujhe zeb nahin hai

mat paDh kisi zalim ka qasida mere aage

duniya-e-mohabbat ka main darwesh hun yaro

ek roz jhukega ye zamana mere aage

taslim karun kaise bhala us ki baDai

'tabish' to hua hai abhi paida mere aage