dushmani hai use mujhse to nibhane aae

dushmanī hai use mujh se to nibhāne aa.e

phuul dene na sahī zaḳhm lagāne aa.e

apnī galiyoñ meñ hameñ apnā makāñ mil na sakā

aaj ham lauT ke jab apne Thikāne aa.e

dāvedāroñ se use thī bahut ummīd magar

qarya-e-ġham meñ hameñ ḳhaak uḌāne aa.e

aish ke rang kisī ko bhī mile hoñ lekin

mere hisse meñ to ḳhushiyoñ ke fasāne aa.e

ham ne dil khol ke haq baat kahī jab bhī kahī

uzr aaya na siyāsat ke bahāne aa.e

ek be-nām udāsī hai dil-o-jāñ pe muhīt

aisā lagtā hai ki phir ġham ke zamāne aa.e

ḳhauf-e-jāñ chhoḌ diyā us se ye kah diije 'niyāz'

apnī tahzīb-o-zabāñ jo bhī miTāne aa.e

dushmani hai use mujh se to nibhane aae

phul dene na sahi zaKHm lagane aae

apni galiyon mein hamein apna makan mil na saka

aaj hum lauT ke jab apne Thikane aae

dawedaron se use thi bahut ummid magar

qarya-e-gham mein hamein KHak uDane aae

aish ke rang kisi ko bhi mile hon lekin

mere hisse mein to KHushiyon ke fasane aae

hum ne dil khol ke haq baat kahi jab bhi kahi

uzr aaya na siyasat ke bahane aae

ek be-nam udasi hai dil-o-jaan pe muhit

aisa lagta hai ki phir gham ke zamane aae

KHauf-e-jaan chhoD diya us se ye kah dije 'niyaz'

apni tahzib-o-zaban jo bhi miTane aae