dushmani larzan hai yaro dosti ke samne

dushmanī larzāñ hai yaaro dostī ke sāmne

tīrgī tharrā rahī hai raushnī ke sāmne

qāfile vāloñ se ye manzar na dekhā jā.egā

rāhbar haiñ sar ba-sajda gumrahī ke sāmne

ruuh to tārīkiyoñ meñ ġharq ho kar rah ga.ī

jism albatta hai apnā raushnī ke sāmne

ik nazar bas aap mere sāmne aa jā.iye

umr bhar baiThā rahūñgā aap hī ke sāmne

tere dāman meñ mahakte haiñ hazāroñ gulsitāñ

aur terā haath phailā hai kalī ke sāmne

zindagī meñ bārhā aise bhī lamhe aa.e haiñ

guftugū sharmā ga.ī hai ḳhāmushī ke sāmne

jo añdhere meñ mazālim toḌte rahte haiñ 'rāz'

aa nahīñ sakte vo zālim raushnī ke sāmne

dushmani larzan hai yaro dosti ke samne

tirgi tharra rahi hai raushni ke samne

qafile walon se ye manzar na dekha jaega

rahbar hain sar ba-sajda gumrahi ke samne

ruh to tarikiyon mein gharq ho kar rah gai

jism albatta hai apna raushni ke samne

ek nazar bas aap mere samne aa jaiye

umr bhar baiTha rahunga aap hi ke samne

tere daman mein mahakte hain hazaron gulsitan

aur tera hath phaila hai kali ke samne

zindagi mein barha aise bhi lamhe aae hain

guftugu sharma gai hai KHamushi ke samne

jo andhere mein mazalim toDte rahte hain 'raaz'

aa nahin sakte wo zalim raushni ke samne