dushmanon ki kabhi fihrist baDhata nahin main

dushmanoñ kī kabhī fihrist baḌhātā nahīñ maiñ

ishq kis se hai kisī ko bhī batātā nahīñ maiñ

us ne is tarah pukārā ki palaTnā hī paḌā

varna ik baar chalā jā.ūñ to aatā nahīñ maiñ

terī qismat ki tū is dil meñ rahā kartā hai

ye vo masnad hai jahāñ sab ko biThātā nahīñ maiñ

mere sayyād mujhe ab to rihā mat karnā

tere daane ke sivā kuchh bhī to khātā nahīñ maiñ

jo bhī hotā hai vo achchhe ke liye hotā hai

is liye zaḳhm pe marham bhī lagātā nahīñ maiñ

apnī marzī se chalātā huuñ ghaḌī ko apnī

vaqt apnā kabhī auroñ se milātā nahīñ maiñ

itnā saada hai ki ḳhat bhī nahīñ likhnā aatā

us ke ḳhat ghar meñ kisī se bhī chhupātā nahīñ maiñ

mujh ko shā.ir kabhī taslīm karegī duniyā

sher kahtā huuñ magar piitā pilātā nahīñ maiñ

dushmanon ki kabhi fihrist baDhata nahin main

ishq kis se hai kisi ko bhi batata nahin main

us ne is tarah pukara ki palaTna hi paDa

warna ek bar chala jaun to aata nahin main

teri qismat ki tu is dil mein raha karta hai

ye wo masnad hai jahan sab ko biThata nahin main

mere sayyaad mujhe ab to riha mat karna

tere dane ke siwa kuchh bhi to khata nahin main

jo bhi hota hai wo achchhe ke liye hota hai

is liye zaKHm pe marham bhi lagata nahin main

apni marzi se chalata hun ghaDi ko apni

waqt apna kabhi auron se milata nahin main

itna sada hai ki KHat bhi nahin likhna aata

us ke KHat ghar mein kisi se bhi chhupata nahin main

mujh ko shair kabhi taslim karegi duniya

sher kahta hun magar pita pilata nahin main