dushmanon se na sage bhai se ghabraate hain

dushmanoñ se na sage bhaa.ī se ghabrāte haiñ

jo bure log haiñ sachchā.ī se ghabrāte haiñ

ham ko izzat mile apnoñ ko burā lagtā hai

is liye hausla-afzā.ī se ghabrāte haiñ

din nikalte hī tirī yaad chalī aatī hai

shaam hotī hai to tanhā.ī se ghabrāte haiñ

ishq to kar leñ magar is meñ hai nuqsān bahut

ham vo baniye haiñ jo bharpā.ī se ghabrāte haiñ

aa.ina sāmne rakh kar na yahāñ baat karo

ye vo bachche haiñ jo parchhā.ī se ghabrāte haiñ

haa.e vo log jo māñ-bāp ko karte haiñ zalīl

aur ik ham jo baḌe bhaa.ī se ghabrāte haiñ

log tālib haiñ ki shohrat kā alam ūñchā ho

aur ham ḳhud kī shanāsā.ī se ghabrāte haiñ

baat karte haiñ samundar meñ utar jaane kī

vo jo tālāb kī gahrā.ī se ghabrāte haiñ

dushmanon se na sage bhai se ghabraate hain

jo bure log hain sachchai se ghabraate hain

hum ko izzat mile apnon ko bura lagta hai

is liye hausla-afzai se ghabraate hain

din nikalte hi teri yaad chali aati hai

sham hoti hai to tanhai se ghabraate hain

ishq to kar len magar is mein hai nuqsan bahut

hum wo baniye hain jo bharpai se ghabraate hain

aaina samne rakh kar na yahan baat karo

ye wo bachche hain jo parchhai se ghabraate hain

hae wo log jo man-bap ko karte hain zalil

aur ek hum jo baDe bhai se ghabraate hain

log talib hain ki shohrat ka alam uncha ho

aur hum KHud ki shanasai se ghabraate hain

baat karte hain samundar mein utar jaane ki

wo jo talab ki gahrai se ghabraate hain