dushwari-e-manzil se dushwar na ho jaen

dushvārī-e-manzil se dushvār na ho jaa.eñ

ham apne hī raste kī dīvār na ho jaa.eñ

zaḳhmoñ pe na bhārī ho ye chāragarī terī

achchhe bhī tire hāthoñ bīmār na ho jaa.eñ

māñgī na duā ham ne ye soch bahāroñ kī

gulshan kahīñ auroñ ke gulzār na ho jaa.eñ

ik aur taqāzā hai hamrāh chalo mere

Dar ye bhī hai dil meñ ham tayyār na ho jaa.eñ

ye saañs kā aa jaanā ye dil kā dhaḌak uThnā

ye kaam bhī kal ham ko dushvār na ho jaa.eñ

tārīki-e-shab se ab kuchh duur saverā hai

bas sub.h se pahle ham bedār na ho jaa.eñ

manzil ko dikhāne haiñ pairoñ ke abhī chhāle

allāh kahīñ raste hamvār na ho jaa.eñ

hai zer-e-nazar sāhil ḳhāmosh hai tūfāñ bhī

is baar kahīñ dariyā ham paar na ho jaa.eñ

dushwari-e-manzil se dushwar na ho jaen

hum apne hi raste ki diwar na ho jaen

zaKHmon pe na bhaari ho ye chaaragari teri

achchhe bhi tere hathon bimar na ho jaen

mangi na dua hum ne ye soch bahaaron ki

gulshan kahin auron ke gulzar na ho jaen

ek aur taqaza hai hamrah chalo mere

Dar ye bhi hai dil mein hum tayyar na ho jaen

ye sans ka aa jaana ye dil ka dhaDak uThna

ye kaam bhi kal hum ko dushwar na ho jaen

tariki-e-shab se ab kuchh dur sawera hai

bas subh se pahle hum bedar na ho jaen

manzil ko dikhane hain pairon ke abhi chhaale

allah kahin raste hamwar na ho jaen

hai zer-e-nazar sahil KHamosh hai tufan bhi

is bar kahin dariya hum par na ho jaen