Dubte suraj jaisa manzar lagta hai

Dūbte sūraj jaisā manzar lagtā hai

hijr meñ bojhal āñkhoñ se Dar lagtā hai

ghus aatā hai ghor añdherā shaam Dhale

chāñd jab aa jaatā hai to ghar lagtā hai

vo to ġhamoñ ke biich bhī hañstā rahtā hai

us kā sarāpā nuur kā paikar lagtā hai

jīvan meñ har shaam saverā aur sahī

kahāñ kahāñ par apnā bistar lagtā hai

sab ke makāñ shīshe ke hote jaate haiñ

dekh ke mere dil par patthar lagtā hai

barf ke chhūne se bhī jal jaate haiñ haath

aur kabhī ik lafz bhī ḳhanjar lagtā hai

jis jānib bhī dekhūñ paivand abr ke haiñ

ambar bhī baabā kī chādar lagtā hai

ab vo log muhāfiz ban ke nikle haiñ

jin ko apnī zaat se ḳhud Dar lagtā hai

hastī ko be-samjhe būḌhe hone lage

jaane 'nāshir' kyoñ ye aksar lagtā hai

Dubte suraj jaisa manzar lagta hai

hijr mein bojhal aankhon se Dar lagta hai

ghus aata hai ghor andhera sham Dhale

chand jab aa jata hai to ghar lagta hai

wo to ghamon ke bich bhi hansta rahta hai

us ka sarapa nur ka paikar lagta hai

jiwan mein har sham sawera aur sahi

kahan kahan par apna bistar lagta hai

sab ke makan shishe ke hote jate hain

dekh ke mere dil par patthar lagta hai

barf ke chhune se bhi jal jate hain hath

aur kabhi ek lafz bhi KHanjar lagta hai

jis jaanib bhi dekhun paiwand abr ke hain

ambar bhi baba ki chadar lagta hai

ab wo log muhafiz ban ke nikle hain

jin ko apni zat se KHud Dar lagta hai

hasti ko be-samjhe buDhe hone lage

jaane 'nashir' kyon ye aksar lagta hai