Dubunga kaise main ki ye pani simaT gaya

Dūbūñgā kaise maiñ ki ye paanī simaT gayā

dariyā to yaar ret ke Tīloñ meñ baT gayā

tanhā.iyāñ bhī haath jhaTak kar chalī ga.iiñ

maiñ bhī kisī charāġh kī lau se lipaT gayā

ik roz apnā qāfila-e-nam dikhā diyā

phir apne aap dukh kā samundar palaT gayā

ik shaam zindagī se udāsī chalī ga.ī

marne kī chaah se bhī mirā jī uchaT gayā

aql-o-ḳhirad pe sach kī siyāhī bikhar ga.ī

raushan huā dimāġh to dil se lipaT gayā

muddat ke baa'd us se mirā sāmnā huā

maiñ ne kahā ki kaun to ā.īna haT gayā

Dubunga kaise main ki ye pani simaT gaya

dariya to yar ret ke Tilon mein baT gaya

tanhaiyan bhi hath jhaTak kar chali gain

main bhi kisi charagh ki lau se lipaT gaya

ek roz apna qafila-e-nam dikha diya

phir apne aap dukh ka samundar palaT gaya

ek sham zindagi se udasi chali gai

marne ki chah se bhi mera ji uchaT gaya

aql-o-KHirad pe sach ki siyahi bikhar gai

raushan hua dimagh to dil se lipaT gaya

muddat ke ba'd us se mera samna hua

main ne kaha ki kaun to aaina haT gaya