duje jahan mein mubtala rahta hun har ghaDi

duuje jahāñ meñ mubtalā rahtā huuñ har ghaḌī

mujh sā tire jahān meñ hogā nahīñ koī

do-chār log hī to mire ġham-gusār haiñ

baaqī jahān saarā mujhe hai ye ajnabī

bo kar do biij lauTā nahīñ koī bāġhbāñ

tā-umr do daraḳht ko banjar zamīñ milī

āvāz koī khīñch ke le aa.ī is taraf

varna to jā chukī thī bahut duur zindagī

ḳhush-hāl zindagī thī maiñ ḳhush-hāl thā bahut

ik dam se ek din mirī duniyā badal ga.ī

ik raat ek ḳhvāb meñ maiñ Dūbtā rahā

ik sub.h aa.ī rū-ba-rū ta.abīr tairtī

itnā bhī ḳhush na bāġhbāñ ho dekh kar bahār

aisī bhī ek maañ hai jo maañ bhī nahīñ banī

kuchh der ḳhāksār se mil paa.ī andalīb

kuchh der baad peḌ girā aur mar ga.ī

har shai to ho ga.ī thī muqābil mire magar

tasvīr ek bārhā merī taraf rahī

Thahro kisī kī aap kyā bigḌī banā.eñge

'sohil' janāb aap se apnī kabhī banī

duje jahan mein mubtala rahta hun har ghaDi

mujh sa tere jahan mein hoga nahin koi

do-chaar log hi to mere gham-gusar hain

baqi jahan sara mujhe hai ye ajnabi

bo kar do bij lauTa nahin koi baghban

ta-umr do daraKHt ko banjar zamin mili

aawaz koi khinch ke le aai is taraf

warna to ja chuki thi bahut dur zindagi

KHush-haal zindagi thi main KHush-haal tha bahut

ek dam se ek din meri duniya badal gai

ek raat ek KHwab mein main Dubta raha

ek subh aai ru-ba-ru tabir tairti

itna bhi KHush na baghban ho dekh kar bahaar

aisi bhi ek man hai jo man bhi nahin bani

kuchh der KHaksar se mil pai andalib

kuchh der baad peD gira aur mar gai

har shai to ho gai thi muqabil mere magar

taswir ek barha meri taraf rahi

Thahro kisi ki aap kya bigDi banaenge

'sohil' janab aap se apni kabhi bani