dur aur pas ke satae hain

duur aur paas ke satā.e haiñ

ham ne hijrat ke dukh uThā.e haiñ

jaane kis paar jā ke utreñge

ḳhvāb ke jo bhī dar banā.e haiñ

apnī miTTī se duur ho kar hī

hijr ke dukh samajh meñ aa.e haiñ

un ke aane se gulsitānoñ ne

ḳhushbūoñ ke kañval khilā.e haiñ

manziloñ ko pata nahīñ ham ne

rāstoñ ke fareb khaa.e haiñ

kisī pahlū qarār aayā nahīñ

dil ne qisse bahut sunā.e haiñ

ham ko 'āshiq' ḳhabar nahīñ us kī

tiir apnoñ ne kab chalā.e haiñ

dur aur pas ke satae hain

hum ne hijrat ke dukh uThae hain

jaane kis par ja ke utrenge

KHwab ke jo bhi dar banae hain

apni miTTi se dur ho kar hi

hijr ke dukh samajh mein aae hain

un ke aane se gulsitanon ne

KHushbuon ke kanwal khilae hain

manzilon ko pata nahin hum ne

raston ke fareb khae hain

kisi pahlu qarar aaya nahin

dil ne qisse bahut sunae hain

hum ko 'ashiq' KHabar nahin us ki

tir apnon ne kab chalae hain