dur nazron se jo ho rahe hain abhi ek din wo nazare palaT aaenge

duur nazroñ se jo ho rahe haiñ abhī ek din vo nazāre palaT ā.eñge

ġham kā sailāb jis dam utar jā.egā saare TuuTe kināre palaT ā.eñge

chāhatoñ ne katar Daale haiñ in ke par ab na jā pā.eñge ye parinde kahīñ

pyaar ke motī juuñ hī luTā.egā tū ye mohabbat ke maare palaT ā.eñge

hājara sī agar hai tirī justujū mehrbāñ tujh pe sahrā bhī ho jā.egā

pyaas terī bujhāne ko ai tishna-lab mīThe paanī ke dhāre palaT ā.eñge

zindagānī kā mausam mire dosto ek jaisā hamesha to rahtā nahīñ

aa.e haiñ bin-bulā.e jo ranj-o-alam din ḳhushī ke bhī pyāre palaT ā.eñge

us ke rahm-o-karam par hai mujh ko yaqīñ merī duniyā bhī ik din vo chamkā.egā

nuur bikhregā dil kī zamīñ par zarūr āsmāñ par sitāre palaT ā.eñge

jo na firqa-parastī hasad dushmanī aur ta.assub ko jaḌ se miTāyā gayā

Dar hai jhulsāne ko āshtī kī fazā nafratoñ ke sharāre palaT ā.eñge

maiñ nahīñ jāntā maiñ kahāñ thā magar 'shād' sargoshiyāñ kar rahā thā koī

jā rahe haiñ falak se jo sū-e-zamīñ hashr ke din vo saare palaT ā.eñge

dur nazron se jo ho rahe hain abhi ek din wo nazare palaT aaenge

gham ka sailab jis dam utar jaega sare TuTe kinare palaT aaenge

chahaton ne katar Dale hain in ke par ab na ja paenge ye parinde kahin

pyar ke moti jun hi luTaega tu ye mohabbat ke mare palaT aaenge

hajara si agar hai teri justuju mehrban tujh pe sahra bhi ho jaega

pyas teri bujhane ko ai tishna-lab miThe pani ke dhaare palaT aaenge

zindagani ka mausam mere dosto ek jaisa hamesha to rahta nahin

aae hain bin-bulae jo ranj-o-alam din KHushi ke bhi pyare palaT aaenge

us ke rahm-o-karam par hai mujh ko yaqin meri duniya bhi ek din wo chamkaega

nur bikhrega dil ki zamin par zarur aasman par sitare palaT aaenge

jo na firqa-parasti hasad dushmani aur tassub ko jaD se miTaya gaya

Dar hai jhulsane ko aashti ki faza nafraton ke sharare palaT aaenge

main nahin jaanta main kahan tha magar 'shad' sargoshiyan kar raha tha koi

ja rahe hain falak se jo su-e-zamin hashr ke din wo sare palaT aaenge