dur rahte hue nazdik-e-rag-e-jaan bhi rahe

duur rahte hue nazdīk-e-rag-e-jāñ bhī rahe

dushman-e-dil bhī rahe dil ke nigahbāñ bhī rahe

Duub jaate haiñ kināre bhī kabhī maujoñ se

ahl-e-sāhil zarā andāza-e-tūfāñ bhī rahe

un kā andāz-e-mohabbat bhī nirālā dekhā

mujh meñ shāmil bhī rahe mujh se gurezāñ bhī rahe

maiñ tire qurb kā vo daur bhulā.ūñ kaise

tere gesū mire shānoñ pe pareshāñ bhī rahe

jis pe logoñ ko farishtoñ kā gumāñ ho jaa.e

kaash is daur meñ aisā koī insāñ bhī rahe

ham ko manzūr nahīñ thī jo numā.ish apnī

bazm meñ misl-e-charāġh-e-tah-e-dāmāñ bhī rahe

ġham-e-jānāñ kā ta.alluq to hai dil se lekin

ham vahī haiñ jo harīf-e-ġham-e-daurāñ bhī rahe

dīda-e-dil se mohabbat kā taqāzā hai yahī

tishna-e-dīd rahe diid kā armāñ bhī rahe

aaj dāman meñ bas ik daulat-e-ġham hai 'ārif'

un kī ulfat meñ kabhī be-sar-o-sāmāñ bhī rahe

dur rahte hue nazdik-e-rag-e-jaan bhi rahe

dushman-e-dil bhi rahe dil ke nigahban bhi rahe

Dub jate hain kinare bhi kabhi maujon se

ahl-e-sahil zara andaza-e-tufan bhi rahe

un ka andaz-e-mohabbat bhi nirala dekha

mujh mein shamil bhi rahe mujh se gurezan bhi rahe

main tere qurb ka wo daur bhulaun kaise

tere gesu mere shanon pe pareshan bhi rahe

jis pe logon ko farishton ka guman ho jae

kash is daur mein aisa koi insan bhi rahe

hum ko manzur nahin thi jo numaish apni

bazm mein misl-e-charagh-e-tah-e-daman bhi rahe

gham-e-jaanan ka talluq to hai dil se lekin

hum wahi hain jo harif-e-gham-e-dauran bhi rahe

dida-e-dil se mohabbat ka taqaza hai yahi

tishna-e-did rahe did ka arman bhi rahe

aaj daman mein bas ek daulat-e-gham hai 'arif'

un ki ulfat mein kabhi be-sar-o-saman bhi rahe