dur se sab ko ye lagta hai sawera hai yahan

duur se sab ko ye lagtā hai saverā hai yahāñ

koī aa.e to vo dekhe ki añdherā hai yahāñ

ġham to ye hai ki vahī shaḳhs nahīñ aatā hai

jis kī guzrī huī rātoñ kā baserā hai yahāñ

duur tak kaalī ghaTāoñ ke sivā kuchh bhī nahīñ

us ne zulfoñ ko kuchh is tarh bikherā hai yahāñ

ye mirā shahr taraqqī meñ yuñhī pīchhe nahīñ

jo hai mansab pe vo har shaḳhs luTerā hai yahāñ

ham palaTnā bhī agar chāheñ to palTeñ kaise

ham ko har moḌ pe hālāt ne gherā hai yahāñ

ġhair to ġhair hai ġhairoñ kī koī baat nahīñ

kaam vo bhī nahīñ aatā hai jo merā hai yahāñ

koī bach jaa.e ye mumkin hī nahīñ hai 'minhāj'

saañp paale hue har ghar meñ saperā hai yahāñ

dur se sab ko ye lagta hai sawera hai yahan

koi aae to wo dekhe ki andhera hai yahan

gham to ye hai ki wahi shaKHs nahin aata hai

jis ki guzri hui raaton ka basera hai yahan

dur tak kali ghaTaon ke siwa kuchh bhi nahin

us ne zulfon ko kuchh is tarh bikhera hai yahan

ye mera shahr taraqqi mein yunhi pichhe nahin

jo hai mansab pe wo har shaKHs luTera hai yahan

hum palaTna bhi agar chahen to palTen kaise

hum ko har moD pe haalat ne ghera hai yahan

ghair to ghair hai ghairon ki koi baat nahin

kaam wo bhi nahin aata hai jo mera hai yahan

koi bach jae ye mumkin hi nahin hai 'minhaj'

sanp pale hue har ghar mein sapera hai yahan