dur ta-hadd-e-nazar aab-e-shajar kuchh bhi nahin

duur tā-hadd-e-nazar āb-e-shajar kuchh bhī nahīñ

jaane kyā kyā thā nigāhoñ meñ magar kuchh bhī nahīñ

jis kī takmīl meñ ik umr huī apnī tamām

vaqt aayā to vo sāmān-e-safar kuchh bhī nahīñ

duur tak phail ga.ī zaḳhm chaTakne kī sadā

vo bahut paas thā aur us ko ḳhabar kuchh bhī nahīñ

har nafas karb ke jañgal meñ bhaTakne ke sivā

āgahī kuchh bhī nahīñ fikr-o-nazar kuchh bhī nahīñ

ab vo ik pal kī masarrat ho ki sadiyoñ kā alam

koī sūrat ho in ashkoñ se mafar kuchh bhī nahīñ

raat phir jal ke pighal ke to sahar tak pahuñcheñ

phir ye dekheñ sar-e-dāmān-e-sahar kuchh bhī nahīñ

dur ta-hadd-e-nazar aab-e-shajar kuchh bhi nahin

jaane kya kya tha nigahon mein magar kuchh bhi nahin

jis ki takmil mein ek umr hui apni tamam

waqt aaya to wo saman-e-safar kuchh bhi nahin

dur tak phail gai zaKHm chaTakne ki sada

wo bahut pas tha aur us ko KHabar kuchh bhi nahin

har nafas karb ke jangal mein bhaTakne ke siwa

aagahi kuchh bhi nahin fikr-o-nazar kuchh bhi nahin

ab wo ek pal ki masarrat ho ki sadiyon ka alam

koi surat ho in ashkon se mafar kuchh bhi nahin

raat phir jal ke pighal ke to sahar tak pahunchen

phir ye dekhen sar-e-daman-e-sahar kuchh bhi nahin