dur tak phaili hui hai tirgi baaten karo

duur tak phailī huī hai tīrgī bāteñ karo

Das na le ham ko kahīñ ye ḳhāmushī bāteñ karo

aao palkoñ se chuneñ bikhre hue lamhāt ko

niiñd aa jaa.e na jab tak ḳhvāb kī bāteñ karo

bas yahī lamhe ġhanīmat haiñ ki ham tum saath haiñ

kaun jaane mil bhī paa.eñ phir kabhī bāteñ karo

sirf ik karb-e-musalsal hī nahīñ hai zindagī

muḳhtasar vaqfe kī sūrat hai ḳhushī bāteñ karo

ruuh ke nāsūr to riste raheñge umr bhar

dard meñ aa jaa.e shāyad kuchh kamī bāteñ karo

kaun jaane kal kā sūraj dekh bhī pā.eñge ham

jab talak hai raat baaqī bas yūñhī bāteñ karo

is qadar ḳhāmosh rahnā bhī nahīñ achchhā 'ravish'

chhā na jaa.e zehn par afsurdagī bāteñ karo

dur tak phaili hui hai tirgi baaten karo

Das na le hum ko kahin ye KHamushi baaten karo

aao palkon se chunen bikhre hue lamhat ko

nind aa jae na jab tak KHwab ki baaten karo

bas yahi lamhe ghanimat hain ki hum tum sath hain

kaun jaane mil bhi paen phir kabhi baaten karo

sirf ek karb-e-musalsal hi nahin hai zindagi

muKHtasar waqfe ki surat hai KHushi baaten karo

ruh ke nasur to riste rahenge umr bhar

dard mein aa jae shayad kuchh kami baaten karo

kaun jaane kal ka suraj dekh bhi paenge hum

jab talak hai raat baqi bas yunhi baaten karo

is qadar KHamosh rahna bhi nahin achchha 'rawish'

chha na jae zehn par afsurdagi baaten karo