duriyan hi duriyan hain qurbaton ke bawajud

dūriyāñ hī dūriyāñ haiñ qurbatoñ ke bāvajūd

ajnabī haiñ sab qarībī nisbatoñ ke bāvajūd

rañg-o-bū se jaan to kāġhaz meñ paḌ saktī nahīñ

kāġhzī gul kāġhzī haiñ nik.hatoñ ke bāvajūd

saḳhtī-e-sahrā-navardī hī masarrat-baḳhsh hai

dil nahīñ lagtā qafas meñ rāhatoñ ke bāvajūd

be-hisī be-ġhairatī bhī juzv-e-fitrat ban ga.ī

hañs rahā huuñ anjuman meñ zillatoñ ke bāvajūd

kar diyā badnām yūsuf se farishte ko magar

pāk-dāman hai zuleḳhā tohmatoñ ke bāvajūd

khol kar baiThā huuñ maiñ ab bhī mohabbat kī dukān

nafratoñ ke fā.ede kī san.atoñ ke bāvajūd

barq se Dar ke nasheman se na uḌ kar jā.iye

baiThe rahiye shāḳh-e-gul par dahshatoñ ke bāvajūd

zehn meñ barpā hai 'kausar' mahsharistān-e-ḳhayāl

kab hai tanhā.ī mayassar ḳhalvatoñ ke bāvajūd

duriyan hi duriyan hain qurbaton ke bawajud

ajnabi hain sab qaribi nisbaton ke bawajud

rang-o-bu se jaan to kaghaz mein paD sakti nahin

kaghzi gul kaghzi hain nikhaton ke bawajud

saKHti-e-sahra-nawardi hi masarrat-baKHsh hai

dil nahin lagta qafas mein rahaton ke bawajud

be-hisi be-ghairati bhi juzw-e-fitrat ban gai

hans raha hun anjuman mein zillaton ke bawajud

kar diya badnam yusuf se farishte ko magar

pak-daman hai zuleKHa tohmaton ke bawajud

khol kar baiTha hun main ab bhi mohabbat ki dukan

nafraton ke faede ki sanaton ke bawajud

barq se Dar ke nasheman se na uD kar jaiye

baiThe rahiye shaKH-e-gul par dahshaton ke bawajud

zehn mein barpa hai 'kausar' mahsharistan-e-KHayal

kab hai tanhai mayassar KHalwaton ke bawajud