dusra taj-mahal koi nahin

dūsrā tāj-mahal koī nahīñ

haa.e is dil kā badal koī nahīñ

terī tanhā.ī kā hal koī nahīñ

ai mire dil na machal koī nahīñ

phuul bulbul ko to gul ko shabnam

aur mire ġham kā badal koī nahīñ

ahd-e-māzī ke fasānoñ ke sivā

ab yahāñ taaza ġhazal koī nahīñ

ek se ek hasīñ phuul khile

tere hoñToñ kā badal koī nahīñ

zindagī hai vo muamma jis kā

laakh ishāre haiñ hal koī nahīñ

phuul haiñ sehn-e-chaman meñ to yahāñ

aaj sab log haiñ kal koī nahīñ

aaj kī raat judā.ī hai 'ayāz'

aaj kī raat ġhazal koī nahīñ

dusra taj-mahal koi nahin

hae is dil ka badal koi nahin

teri tanhai ka hal koi nahin

ai mere dil na machal koi nahin

phul bulbul ko to gul ko shabnam

aur mere gham ka badal koi nahin

ahd-e-mazi ke fasanon ke siwa

ab yahan taza ghazal koi nahin

ek se ek hasin phul khile

tere honTon ka badal koi nahin

zindagi hai wo muamma jis ka

lakh ishaare hain hal koi nahin

phul hain sehn-e-chaman mein to yahan

aaj sab log hain kal koi nahin

aaj ki raat judai hai 'ayaz'

aaj ki raat ghazal koi nahin