duzdida nigahon ka asar dekh liya hai

duzdīda nigāhoñ kā asar dekh liyā hai

baḌhtā huā kuchh dard-e-jigar dekh liyā hai

ik aag sī har vaqt lagī rahtī hai dil meñ

maiñ ne ye mohabbat kā asar dekh liyā hai

ab mehrbāñ koī na rahā merā jahāñ meñ

kal yaar ko aġhyār ke ghar dekh liyā hai

kyoñ sahmā huā hai tū batā ai dil-e-nādāñ

kyā chaltā huā tīr-e-nazar dekh liyā hai

dil merā nahīñ lagtā kisī aur jahāñ meñ

jis roz se aakar tirā dar dekh liyā hai

āñkhoñ se to maiñ un ko nahīñ dekh sakā huuñ

ik roz tasavvur meñ magar dekh liyā hai

dekhūñgā 'samī.a' kyā vo kisī or jahāñ meñ

maiñ ne jo yahāñ shām-o-sahar dekh liyā hai

duzdida nigahon ka asar dekh liya hai

baDhta hua kuchh dard-e-jigar dekh liya hai

ek aag si har waqt lagi rahti hai dil mein

main ne ye mohabbat ka asar dekh liya hai

ab mehrban koi na raha mera jahan mein

kal yar ko aghyar ke ghar dekh liya hai

kyon sahma hua hai tu bata ai dil-e-nadan

kya chalta hua tir-e-nazar dekh liya hai

dil mera nahin lagta kisi aur jahan mein

jis roz se aakar tera dar dekh liya hai

aankhon se to main un ko nahin dekh saka hun

ek roz tasawwur mein magar dekh liya hai

dekhunga 'samia' kya wo kisi or jahan mein

main ne jo yahan sham-o-sahar dekh liya hai