etibar-e-wada-e-zahmat ki nadani gai

e'tibār-e-vā'da-e-zahmat kī nādānī ga.ī

aaj tak jo dil meñ thī vo kufr-sāmānī ga.ī

vaqt ke hamrāh apnī kaif-sāmānī ga.ī

dekhte hī dekhte āsā.ish arzānī ga.ī

husn-e-be-parvā ko in bātoñ se dilchaspī nahīñ

kaun pūchhe dar-ba-dar kī ḳhaak kyoñ chhānī ga.ī

aadmī badnām thā lekin guloñ kī ye ravish

ham samajhte the ki rasm-e-chāk-dāmānī ga.ī

dosto pahchān kī nazreñ hī shāyad bujh ga.iiñ

āshnā-sūrat bhī jab tum se na pahchānī ga.ī

ab to maiñ huuñ aur apnā ehtisāb-o-jā.eza

har kitāb-e-zīst kī aurāq-gardānī ga.ī

sa'y-e-zabt-e-ġham ke tum ho ik nishān-e-mo'atabar

sirf itnī baat par chehre kī vīrānī ga.ī

dīdanī hai sehr-kārī-e-harīm-e-kāfirī

kaise kaise pārsā kī pāk-dāmānī ga.ī

kyā samajh kar tum pashemān-e-shikast-e-'ahd ho

shukr hai taklīf-e-ehsās-e-pareshānī ga.ī

ai nigāh-e-iltifāt-e-dost ye kyā ho gayā

jo mire she'roñ meñ thī vo sho'la-sāmānī ga.ī

aaj tak to arz-e-ġham par zabt ke pahre rahe

kis kamī se us tavajjoh kī farāvānī ga.ī

mere gird-o-pesh thā saut-o-sadā kā ik hujūm

is fazā meñ bhī mirī āvāz pahchānī ga.ī

dhuup meñ to ham the lekin qismat-e-ahl-e-duval

jis jagah hājat na thī chādar vahāñ taanī ga.ī

ai 'urūj' ab 'aam hai shikva 'adam-tarsīl kā

'mīr'-o-'momin' ke zamāne kī ġhazal-ḳhvānī ga.ī

e'tibar-e-wa'da-e-zahmat ki nadani gai

aaj tak jo dil mein thi wo kufr-samani gai

waqt ke hamrah apni kaif-samani gai

dekhte hi dekhte aasaish arzani gai

husn-e-be-parwa ko in baaton se dilchaspi nahin

kaun puchhe dar-ba-dar ki KHak kyon chhani gai

aadmi badnam tha lekin gulon ki ye rawish

hum samajhte the ki rasm-e-chaak-damani gai

dosto pahchan ki nazren hi shayad bujh gain

aashna-surat bhi jab tum se na pahchani gai

ab to main hun aur apna ehtisab-o-jaeza

har kitab-e-zist ki auraq-gardani gai

sa'y-e-zabt-e-gham ke tum ho ek nishan-e-mo'atabar

sirf itni baat par chehre ki virani gai

didani hai sehr-kari-e-harim-e-kafiri

kaise kaise parsa ki pak-damani gai

kya samajh kar tum pasheman-e-shikast-e-'ahd ho

shukr hai taklif-e-ehsas-e-pareshani gai

ai nigah-e-iltifat-e-dost ye kya ho gaya

jo mere she'ron mein thi wo sho'la-samani gai

aaj tak to arz-e-gham par zabt ke pahre rahe

kis kami se us tawajjoh ki farawani gai

mere gird-o-pesh tha saut-o-sada ka ek hujum

is faza mein bhi meri aawaz pahchani gai

dhup mein to hum the lekin qismat-e-ahl-e-duwal

jis jagah hajat na thi chadar wahan tani gai

ai 'uruj' ab 'am hai shikwa 'adam-tarsil ka

'mir'-o-'momin' ke zamane ki ghazal-KHwani gai