etimad-e-ishq ko kyon raegan samjha tha main

e'timād-e-ishq ko kyoñ rā.egāñ samjhā thā maiñ

un ke jalve bhī vahīñ nikle jahāñ samjhā thā maiñ

ek pasandīda giraftārī thī āzādī na thī

ek qafas thā vo bhī jis ko āshiyāñ samjhā thā maiñ

kis qadar ta.ane diye haiñ himmat-e-parvāz ne

sochtā huuñ kyoñ qafas ko āshiyāñ samjhā thā maiñ

ai ma.āz-allāh mafhūm-e-vafā kī vus.ateñ

zindagī ko muḳhtasar sī dāstāñ samjhā thā maiñ

kis qadar marġhūb thā dil ko muqaddar kā fareb

ek parda thā jahāñ sab kuchh nihāñ samjhā thā maiñ

bāvajūd-e-gumrahī allāh-re josh-e-talāsh

manziloñ ko bhī ġhubār-e-kārvāñ samjhā thā maiñ

kyā ḳhabar 'shādāñ' ye ġham bhī jāvedāñ hai yā nahīñ

aish ko bhī yuuñ hī kuchh din jāvedāñ samjhā thā maiñ

e'timad-e-ishq ko kyon raegan samjha tha main

un ke jalwe bhi wahin nikle jahan samjha tha main

ek pasandida giraftari thi aazadi na thi

ek qafas tha wo bhi jis ko aashiyan samjha tha main

kis qadar tane diye hain himmat-e-parwaz ne

sochta hun kyon qafas ko aashiyan samjha tha main

ai maaz-allah mafhum-e-wafa ki wusaten

zindagi ko muKHtasar si dastan samjha tha main

kis qadar marghub tha dil ko muqaddar ka fareb

ek parda tha jahan sab kuchh nihan samjha tha main

bawajud-e-gumrahi allah-re josh-e-talash

manzilon ko bhi ghubar-e-karwan samjha tha main

kya KHabar 'shadan' ye gham bhi jawedan hai ya nahin

aish ko bhi yun hi kuchh din jawedan samjha tha main