ehsas ke sharar ko hua dene aaunga

ehsās ke sharar ko huā dene ā.ūñgā

maiñ shahr-e-jāñ ko raakh banā dene ā.ūñgā

likkhe the harf-e-shauq jo maiñ ne tire liye

ab āñ.suoñ se un ko miTā dene ā.ūñgā

tū ne atā kiye haiñ mujhe kitne dard-o-ġham

is lutf-e-ḳhās kā maiñ sila dene ā.ūñgā

samjhā diyā hai tū ne mohabbat hai ik ḳhatā

maiñ is ḳhatā kī ḳhud ko sazā dene ā.ūñgā

aayā tirī galī meñ agar lauT kar kabhī

guzre hue dinoñ ko sadā dene ā.ūñgā

paayā thā rāh-e-shauq meñ jo karb-e-āgahī

is karb-e-āgahī ko sulā dene ā.ūñgā

bāhar nikal ke jism ke zindāñ se ek din

maiñ tujh ko zindagī kī duā dene ā.ūñgā

maiñ kushta-e-vafā sahī 'nāsir' magar zarūr

ik bevafā ko dād-e-vafā dene ā.ūñgā

ehsas ke sharar ko hua dene aaunga

main shahr-e-jaan ko rakh bana dene aaunga

likkhe the harf-e-shauq jo main ne tere liye

ab aansuon se un ko miTa dene aaunga

tu ne ata kiye hain mujhe kitne dard-o-gham

is lutf-e-KHas ka main sila dene aaunga

samjha diya hai tu ne mohabbat hai ek KHata

main is KHata ki KHud ko saza dene aaunga

aaya teri gali mein agar lauT kar kabhi

guzre hue dinon ko sada dene aaunga

paya tha rah-e-shauq mein jo karb-e-agahi

is karb-e-agahi ko sula dene aaunga

bahar nikal ke jism ke zindan se ek din

main tujh ko zindagi ki dua dene aaunga

main kushta-e-wafa sahi 'nasir' magar zarur

ek bewafa ko dad-e-wafa dene aaunga