احساس کی قندیل وہ جلنے نہیں دیتا

احساس کی قندیل وہ جلنے نہیں دیتا

افکار کو اشعار میں ڈھلنے نہیں دیتا

وہ چشمۂ جذبات ابلنے نہیں دیتا

آنکھوں سے مری اشک نکلنے نہیں دیتا

گرداب بلا حد سے نکلنے نہیں دیتا

چاہوں جو سنبھلنا تو سنبھلنے نہیں دیتا

انداز انا ہے کہ یہ احساس ندامت

جو ذات کے صحرا سے نکلنے نہیں دیتا

نالاں ہے مرے ذہن سے خورشید تمنا

جو برف جمی ہے وہ پگھلنے نہیں دیتا

گھیرے ہے مجھے ترک تعلق کا وہ لمحہ

موسم کی طرح رنگ بدلنے نہیں دیتا

برسوں جسے سمجھائے تھے آداب مراسم

اب مجھ کو وہی شخص سنبھلنے نہیں دیتا

ہے اس کو سلگتے ہوئے موسم سے شکایت

رخ بھی وہ ہواؤں کا بدلنے نہیں دیتا

اس دور ترقی کا یہ اعجاز ہے ساجدؔ

فرسودہ روایات پہ چلنے نہیں دیتا