ehsas ki qindil wo jalne nahin deta

ehsās kī qindīl vo jalne nahīñ detā

afkār ko ash.ār meñ Dhalne nahīñ detā

vo chashma-e-jazbāt ubalne nahīñ detā

āñkhoñ se mirī ashk nikalne nahīñ detā

girdāb-e-balā had se nikalne nahīñ detā

chāhūñ jo sañbhalnā to sañbhalne nahīñ detā

andāz-e-anā hai ki ye ehsās-e-nadāmat

jo zaat ke sahrā se nikalne nahīñ detā

nālāñ hai mire zehn se ḳhurshīd-e-tamannā

jo barf jamī hai vo pighalne nahīñ detā

ghere hai mujhe tark-e-ta.alluq kā vo lamha

mausam kī tarah rang badalne nahīñ detā

barsoñ jise samjhā.e the ādāb-e-marāsim

ab mujh ko vahī shaḳhs sañbhalne nahīñ detā

hai us ko sulagte hue mausam se shikāyat

ruḳh bhī vo havāoñ kā badalne nahīñ detā

is daur-e-taraqqī kā ye e.ajāz hai 'sājid'

farsūda rivāyāt pe chalne nahīñ detā

ehsas ki qindil wo jalne nahin deta

afkar ko ashaar mein Dhalne nahin deta

wo chashma-e-jazbaat ubalne nahin deta

aankhon se meri ashk nikalne nahin deta

girdab-e-bala had se nikalne nahin deta

chahun jo sanbhalna to sanbhalne nahin deta

andaz-e-ana hai ki ye ehsas-e-nadamat

jo zat ke sahra se nikalne nahin deta

nalan hai mere zehn se KHurshid-e-tamanna

jo barf jami hai wo pighalne nahin deta

ghere hai mujhe tark-e-talluq ka wo lamha

mausam ki tarah rang badalne nahin deta

barson jise samjhae the aadab-e-marasim

ab mujh ko wahi shaKHs sanbhalne nahin deta

hai us ko sulagte hue mausam se shikayat

ruKH bhi wo hawaon ka badalne nahin deta

is daur-e-taraqqi ka ye eajaz hai 'sajid'

farsuda riwayat pe chalne nahin deta