ehsas se aari hain wo andar se ziyaada

ehsās se 'aarī haiñ vo andar se ziyāda

ahbāb mire saḳht haiñ patthar se ziyāda

tanhā sā paḌā rahtā huuñ maiñ kunj-e-makāñ meñ

ik shor sā barpā hai samundar se ziyāda

kuchh yādoñ ke saa.e mujhe jiine nahīñ dete

zaḳhmī huuñ maiñ alfāz ke ḳhanjar se ziyāda

niklūñ maiñ kahāñ par ki shanāsā nahīñ koī

vīrān hai ye shahr mire ghar se ziyāda

raste mire gum-gashta haiñ manzil bhī huī gum

chaltā huuñ baḌā tez maiñ rahbar se ziyāda

hai faḳhr ki huuñ shāh-e-madīna kā maiñ ḳhādim

hai kaun mirā shāfe'-e-mahshar se ziyāda

hairat hai ki bāzār meñ kis chiiz ko bechūñ

dastār ke bhaao haiñ mire sar se ziyāda

koshish jo huī ham se vo ham ne bhī kī 'barham'

miltā hī nahīñ rizq muqaddar se ziyāda

ehsas se 'ari hain wo andar se ziyaada

ahbab mere saKHt hain patthar se ziyaada

tanha sa paDa rahta hun main kunj-e-makan mein

ek shor sa barpa hai samundar se ziyaada

kuchh yaadon ke sae mujhe jine nahin dete

zaKHmi hun main alfaz ke KHanjar se ziyaada

niklun main kahan par ki shanasa nahin koi

viran hai ye shahr mere ghar se ziyaada

raste mere gum-gashta hain manzil bhi hui gum

chalta hun baDa tez main rahbar se ziyaada

hai faKHr ki hun shah-e-madina ka main KHadim

hai kaun mera shafe'-e-mahshar se ziyaada

hairat hai ki bazar mein kis chiz ko bechun

dastar ke bhao hain mere sar se ziyaada

koshish jo hui hum se wo hum ne bhi ki 'barham'

milta hi nahin rizq muqaddar se ziyaada