ehtiram-e-lab-o-ruKHsar tak aa pahunche hain

ehtirām-e-lab-o-ruḳhsār tak aa pahuñche haiñ

bul-havas bhī mire me.aar tak aa pahuñche haiñ

jo haqā.eq the vo ashkoñ se ham-āġhosh hue

jo fasāne the vo sarkār tak aa pahuñche haiñ

kyā vo nazroñ ko jharoke meñ muallaq kar deñ

jo tire sāya-e-dīvār tak aa pahuñche haiñ

apnī taqdīr ko rote raheñ sāhil vaale

jin ko aanā thā vo mañjdhār tak aa pahuñche haiñ

ab to khul jā.egā shāyad tirī ulfat kā bharam

ahl-e-dil jur.at-e-iz.hār tak aa pahuñche haiñ

ek tum ho ki ḳhudā ban ke chhupe baiThe ho

ek ham haiñ ki lab-e-dār tak aa pahuñche haiñ

ehtiram-e-lab-o-ruKHsar tak aa pahunche hain

bul-hawas bhi mere mear tak aa pahunche hain

jo haqaeq the wo ashkon se ham-aghosh hue

jo fasane the wo sarkar tak aa pahunche hain

kya wo nazron ko jharoke mein muallaq kar den

jo tere saya-e-diwar tak aa pahunche hain

apni taqdir ko rote rahen sahil wale

jin ko aana tha wo manjdhaar tak aa pahunche hain

ab to khul jaega shayad teri ulfat ka bharam

ahl-e-dil jurat-e-izhaar tak aa pahunche hain

ek tum ho ki KHuda ban ke chhupe baiThe ho

ek hum hain ki lab-e-dar tak aa pahunche hain