ek be-manzar udasi chaar-su aankhon mein hai
ek be-manzar udāsī chār-sū āñkhoñ meñ hai
jitnā baaqī hai mire dil kā lahū āñkhoñ meñ hai
jism-o-jāñ pāmāl-e-sadmāt-e-taġhāful ho chuke
ab to jo hai māvarā-e-guftugū āñkhoñ meñ hai
ḳhatm hotā hī nahīñ bedār lamhoñ kā azaab
niiñd jaise koī zaḳhm-e-be-rafū āñkhoñ meñ hai
tishnagī kā ik parinda chīḳhtā hai zehn meñ
qarya-e-jāñ kī ye kaisī āb-jū āñkhoñ meñ hai
bahte ashkoñ par likhī tahrīr raushan hai abhī
ek va.ada ek paikar hū-ba-hū āñkhoñ meñ hai
maiñ bayābāñ kī bikhartī dhuup huuñ be-samt-o-saut
ab koī saudā hai sar meñ aur na tū āñkhoñ meñ hai
kis taraf dekhūñ 'mujībī' kis se rishta joḌ luuñ
rū-ba-rū duniyā hai phir bhī dasht-e-hū āñkhoñ meñ hai
ek be-manzar udasi chaar-su aankhon mein hai
jitna baqi hai mere dil ka lahu aankhon mein hai
jism-o-jaan pamal-e-sadmat-e-taghaful ho chuke
ab to jo hai mawara-e-guftugu aankhon mein hai
KHatm hota hi nahin bedar lamhon ka azab
nind jaise koi zaKHm-e-be-rafu aankhon mein hai
tishnagi ka ek parinda chiKHta hai zehn mein
qarya-e-jaan ki ye kaisi aab-ju aankhon mein hai
bahte ashkon par likhi tahrir raushan hai abhi
ek wada ek paikar hu-ba-hu aankhon mein hai
main bayaban ki bikharti dhup hun be-samt-o-saut
ab koi sauda hai sar mein aur na tu aankhon mein hai
kis taraf dekhun 'mujibi' kis se rishta joD lun
ru-ba-ru duniya hai phir bhi dasht-e-hu aankhon mein hai
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
