ek be-rang nazara bhi to ja sakta tha

ek be-rang nazāra bhī to jā saktā thā

maiñ un āñkhoñ meñ utārā bhī to jā saktā thā

mujh se shikva ki palaT kar nahīñ dekhā maiñ ne

mujhe ik baar pukārā bhī to jā saktā thā

chalo duniyā ke sabab baat nahīñ thī mumkin

āñkhoñ āñkhoñ meñ ishāra bhī to jā saktā thā

bikhre bāloñ pe mire tanz se hañsne vaale

mere bāloñ ko sañvārā bhī to jā saktā thā

kyā zarūrī hai ki har khel sadā tum jiito

zindagī meñ kabhī haarā bhī to jā saktā thā

baḌe zālim ho judā.ī kī sazā dī mujh ko

jān-e-jāñ jaan se maarā bhī to jā saktā thā

ab sulagtī hai hathelī to ḳhayāl aatā hai

vo badan sirf nihārā bhī to jā saktā thā

ek be-rang nazara bhi to ja sakta tha

main un aankhon mein utara bhi to ja sakta tha

mujh se shikwa ki palaT kar nahin dekha main ne

mujhe ek bar pukara bhi to ja sakta tha

chalo duniya ke sabab baat nahin thi mumkin

aankhon aankhon mein ishaara bhi to ja sakta tha

bikhre baalon pe mere tanz se hansne wale

mere baalon ko sanwara bhi to ja sakta tha

kya zaruri hai ki har khel sada tum jito

zindagi mein kabhi haara bhi to ja sakta tha

baDe zalim ho judai ki saza di mujh ko

jaan-e-jaan jaan se mara bhi to ja sakta tha

ab sulagti hai hatheli to KHayal aata hai

wo badan sirf nihaara bhi to ja sakta tha