ek bhi ghar tha kahan naql-e-makani ke liye

ek bhī ghar thā kahāñ naql-e-makānī ke liye

ham khañDar hī meñ rahe marsiya-ḳhvānī ke liye

ḳhāna-e-dil huā vīrāñ tire naġhmoñ ke baġhair

rah ga.ī guuñj faqat dard-e-nihānī ke liye

vādī-e-jāñ ko jo mahkā gayā zaḳhmoñ se mirī

de gayā lazzat-e-ġham bhī vo nishānī ke liye

pyaas ke dasht meñ dariyā bhī sarāboñ kā milā

manzil-e-shauq tarastī rahī paanī ke liye

paikar-e-sher meñ tasvīr utārī maiñ ne

yuuñ tarāshe na.e alfāz ma.ānī ke liye

dard kī aag meñ jaltā hai har ik harf mirā

dekh ye arz-e-hunar sho.ala-fishānī ke liye

maujzan hai mire jazboñ kā samundar lekin

yaad ne aur havā dī hai ravānī ke liye

ek bhi ghar tha kahan naql-e-makani ke liye

hum khanDar hi mein rahe marsiya-KHwani ke liye

KHana-e-dil hua viran tere naghmon ke baghair

rah gai gunj faqat dard-e-nihani ke liye

wadi-e-jaan ko jo mahka gaya zaKHmon se meri

de gaya lazzat-e-gham bhi wo nishani ke liye

pyas ke dasht mein dariya bhi sarabon ka mila

manzil-e-shauq tarasti rahi pani ke liye

paikar-e-sher mein taswir utari main ne

yun tarashe nae alfaz maani ke liye

dard ki aag mein jalta hai har ek harf mera

dekh ye arz-e-hunar shoala-fishani ke liye

maujzan hai mere jazbon ka samundar lekin

yaad ne aur hawa di hai rawani ke liye