ek billor si murat thi sarape mein sahar

ek billor sī mūrat thī sarāpe meñ 'sahar'

chhan se TuuTī hai magar ek chhanāke meñ 'sahar'

paañv kī uñgliyāñ muḌ jaatī haiñ baiThe baiThe

chyūñTiyāñ reñgtī haiñ tan ke burāde meñ 'sahar'

TūTte rahte haiñ kuchh ḳhvāb sitāroñ jaise

kirchiyāñ phailtī rahtī haiñ ḳharābe meñ 'sahar'

kāġhazoñ meñ to likhā hogā usī ghar kā patā

ḳhud vo rahtā hai kisī aur ilāqe meñ 'sahar'

kitnī mushkil se guzartā hai lahū rag rag se

uñgliyāñ bāñdh rahā hai koī dhāge meñ 'sahar'

kachchī pencil kī lakīroñ se ubhāre the nuqūsh

sidq dhuñdlā gayā miTte hue ḳhāke meñ 'sahar'

yūñhī ma.amūl kī ik baat pe dil TuuT gayā

ghar to TuuTā thā kisī aur dhamāke meñ 'sahar'

zard chehroñ pe lakīroñ kī zabāñ kaun paḌhe

vaqt kuchh shā.irī kartā hai buḌhāpe meñ 'sahar'

ek billor si murat thi sarape mein 'sahar'

chhan se TuTi hai magar ek chhanake mein 'sahar'

panw ki ungliyan muD jati hain baiThe baiThe

chyunTiyan rengti hain tan ke burade mein 'sahar'

TuTte rahte hain kuchh KHwab sitaron jaise

kirchiyan phailti rahti hain KHarabe mein 'sahar'

kaghazon mein to likha hoga usi ghar ka pata

KHud wo rahta hai kisi aur ilaqe mein 'sahar'

kitni mushkil se guzarta hai lahu rag rag se

ungliyan bandh raha hai koi dhage mein 'sahar'

kachchi pencil ki lakiron se ubhaare the nuqush

sidq dhundla gaya miTte hue KHake mein 'sahar'

yunhi mamul ki ek baat pe dil TuT gaya

ghar to TuTa tha kisi aur dhamake mein 'sahar'

zard chehron pe lakiron ki zaban kaun paDhe

waqt kuchh shairi karta hai buDhape mein 'sahar'