ek do tin nahin sare qabail kar le

ek do tiin nahīñ saare qabā.il kar le

koī mantiq hai tire paas jo qaa.il kar le

jurm sābit hai muāfī to nahīñ ho saktī

pesh karne haiñ agar tū ne dalā.el kar le

saf-e-avval kā sipāhī huuñ so marne se rahā

ab tū aayā hai to yuuñ kar mujhe ghāyal kar le

qaht huuñ aur tire shahr meñ paḌ saktā huuñ

jitne kar saktā hai muTThī meñ vasā.il kar le

itnā kachchā nahīñ 'qāsim' ki haqīqat ke sivā

apnī bīnā.ī kisī ḳhvāb pe zaa.il kar le

ek do tin nahin sare qabail kar le

koi mantiq hai tere pas jo qail kar le

jurm sabit hai muafi to nahin ho sakti

pesh karne hain agar tu ne dalael kar le

saf-e-awwal ka sipahi hun so marne se raha

ab tu aaya hai to yun kar mujhe ghayal kar le

qaht hun aur tere shahr mein paD sakta hun

jitne kar sakta hai muTThi mein wasail kar le

itna kachcha nahin 'qasim' ki haqiqat ke siwa

apni binai kisi KHwab pe zail kar le