ek duniya kah rahi hai kaun kis ka aashna

ek duniyā kah rahī hai kaun kis kā āshnā

maiñ hī vo thā jis ne ik duniyā ko samjhā āshnā

pūchhte haiñ bujhte lamhoñ ke khañDar har shaam ko

ho ga.ī kyā dil kī vo sham-e-ḳharāba āshnā

DhūñDhtā hai der se kho.e hue sikke kī tarah

māzī-e-ḳhāmosh ko imroz fardā-āshnā

ye zamīñ sadiyoñ pe jis kī aag ne badlā thā ruup

rafta rafta ho chalī ik barg sho.ala-āshnā

naḳhl-hā-e-rah-guzar tum kyā hameñ pahchānte

kitne saa.e kho chukā hai zauq-e-sahrā-āshnā

kārobār-e-qurbat-o-dūrī meñ aksar ban ga.e

ajnabī iḳhlās gesū āshnā nā-āshnā

vus.at-e-dāmāñ kā 'hurmat' jā.eza lenā paḌā

mahv-e-ġhavvāsī hai kab se fikr dariyā-āshnā

ek duniya kah rahi hai kaun kis ka aashna

main hi wo tha jis ne ek duniya ko samjha aashna

puchhte hain bujhte lamhon ke khanDar har sham ko

ho gai kya dil ki wo sham-e-KHaraba aashna

DhunDhta hai der se khoe hue sikke ki tarah

mazi-e-KHamosh ko imroz farda-ashna

ye zamin sadiyon pe jis ki aag ne badla tha rup

rafta rafta ho chali ek barg shoala-ashna

naKHl-ha-e-rah-guzar tum kya hamein pahchante

kitne sae kho chuka hai zauq-e-sahra-ashna

karobar-e-qurbat-o-duri mein aksar ban gae

ajnabi iKHlas gesu aashna na-ashna

wusat-e-daman ka 'hurmat' jaeza lena paDa

mahw-e-ghawwasi hai kab se fikr dariya-ashna