ek ek jharoka KHanda-ba-lab ek ek gali kohram

ek ek jharokā ḳhanda-ba-lab ek ek galī kohrām

ham lab se lagā kar jaam hue badnām baḌe badnām

rut badlī ki sadiyāñ lauT aa.iiñ uf yaad kisī kī yaad

phir sail-e-zamāñ meñ tair gayā ik naam kisī kā naam

dil hai ki ik ajnabī-e-hairāñ tum ho ki parāyā des

nazroñ kī kahānī ban na sakīñ hoñToñ pe ruke paiġhām

rauñdeñ to ye kaliyāñ nīsh-e-balā chūmeñ to ye sho.ale phuul

ye ġham ye kisī kī den bhī hai in.aam ajab in.aam

ai tīrgiyoñ kī ghūmtī rau koī to rasīlī sub.h

ai raushniyoñ kī Doltī lau ik shaam nashīlī shaam

rah rah ke jiyāle rāhiyoñ ko detā hai ye kaun āvāz

kaunain kī hañstī muñDeroñ par tum ho ki ġham-e-ayyām

be-barg shajar gardūñ kī taraf phailā.eñ humakte haat

phūloñ se bharī Dhalvān pe sūkhe paat kareñ bisrām

ham fikr meñ haiñ is aalam kā dastūr hai kyā dastūr

ye kis ko ḳhabar is fikr kā hai dastūr-e-do-ālam naam

ek ek jharoka KHanda-ba-lab ek ek gali kohram

hum lab se laga kar jam hue badnam baDe badnam

rut badli ki sadiyan lauT aain uf yaad kisi ki yaad

phir sail-e-zaman mein tair gaya ek nam kisi ka nam

dil hai ki ek ajnabi-e-hairan tum ho ki paraya des

nazron ki kahani ban na sakin honTon pe ruke paigham

raunden to ye kaliyan nish-e-bala chumen to ye shoale phul

ye gham ye kisi ki den bhi hai inam ajab inam

ai tirgiyon ki ghumti rau koi to rasili subh

ai raushniyon ki Dolti lau ek sham nashili sham

rah rah ke jiyale rahiyon ko deta hai ye kaun aawaz

kaunain ki hansti munDeron par tum ho ki gham-e-ayyam

be-barg shajar gardun ki taraf phailaen humakte hat

phulon se bhari Dhalwan pe sukhe pat karen bisram

hum fikr mein hain is aalam ka dastur hai kya dastur

ye kis ko KHabar is fikr ka hai dastur-e-do-alam nam