ek fitna sa uThaya hai chala jaega

ek fitna sā uThāyā hai chalā jā.egā

vaqt be-vaqt jo aayā hai chalā jā.egā

shahr ko saare jalāne ke liye niklā thā

ab jo ghar merā jalāyā hai chalā jā.egā

baiThnā hai to ghane peḌ ke nīche baiTho

ye to dīvār kā saayā hai chalā jā.egā

ham ko māregā kahāñ shīsh-mahal meñ rah kar

sirf patthar hī uThāyā hai chalā jā.egā

vo to aatā hai añdhere hī meñ Dasne ke liye

ab to har samt ujālā hai chalā jā.egā

ḳhud hī thak jā.egā jab gāliyāñ de kar mujh ko

us pe itnā to bharosa hai chalā jā.egā

us ne chup rah ke bhī tūfān uThā.e kitne

aaj kohrām machāyā hai chalā jā.egā

soch ke aayā thā duniyā meñ sab apne hoñge

apnā saaya bhī parāyā hai chalā jā.egā

ġham ke aane kā koī ġham nahīñ ham ko 'asġhar'

apnī marzī hī se aayā hai chalā jā.egā

ek fitna sa uThaya hai chala jaega

waqt be-waqt jo aaya hai chala jaega

shahr ko sare jalane ke liye nikla tha

ab jo ghar mera jalaya hai chala jaega

baiThna hai to ghane peD ke niche baiTho

ye to diwar ka saya hai chala jaega

hum ko marega kahan shish-mahal mein rah kar

sirf patthar hi uThaya hai chala jaega

wo to aata hai andhere hi mein Dasne ke liye

ab to har samt ujala hai chala jaega

KHud hi thak jaega jab galiyan de kar mujh ko

us pe itna to bharosa hai chala jaega

us ne chup rah ke bhi tufan uThae kitne

aaj kohram machaya hai chala jaega

soch ke aaya tha duniya mein sab apne honge

apna saya bhi paraya hai chala jaega

gham ke aane ka koi gham nahin hum ko 'asghar'

apni marzi hi se aaya hai chala jaega