ek hi jaise lage sunne mein afsane kai

ek hī jaise lage sunñe meñ afsāne ka.ī

ho bhī saktā hai ki is duniyā meñ hoñ ham se ka.ī

chaar āñkheñ chāhiyeñ us kī hifāzat ke liye

āne-jāne ke liye jis ghar meñ hoñ raste ka.ī

ḳhud-irādī aur āzādī kī barakat dekhiye

ghar ke āñgan meñ nazar aate haiñ ab chūlhe ka.ī

dil na hoñ jab saaf to mil baiThne kā fā.eda

ho chuke haiñ yuuñ to maazī meñ bhī samjhaute ka.ī

aadmī ke par lage haiñ jab se simTī hai zamīñ

des jaise bhes ko darkār haiñ chole ka.ī

Than ga.ī hai is liye taqdīr aur tadbīr meñ

haath to har ik ke do haiñ aur gul-daste ka.ī

baat qismat kī nahīñ dil thā havas-nā-āshnā

varna ham ko bhī mile the kaam ke bande ka.ī

qurbatoñ se fāsloñ ko his kī bedārī milī

jism-o-jāñ ke darmiyāñ aa.e nazar parde ka.ī

bhiiḌ meñ aise ghire ki baḌh ga.iiñ tanhā.iyāñ

saath hī lekin hue ābād vīrāne ka.ī

lab pe halkī sī hañsī aur qalb Dāñvā-Dol hai

raah meñ ka.abe ke paḌte haiñ sanam-ḳhāne ka.ī

ek hi jaise lage sunne mein afsane kai

ho bhi sakta hai ki is duniya mein hon hum se kai

chaar aankhen chahiyen us ki hifazat ke liye

aane-jaane ke liye jis ghar mein hon raste kai

KHud-iradi aur aazadi ki barakat dekhiye

ghar ke aangan mein nazar aate hain ab chulhe kai

dil na hon jab saf to mil baiThne ka faeda

ho chuke hain yun to mazi mein bhi samjhaute kai

aadmi ke par lage hain jab se simTi hai zamin

des jaise bhes ko darkar hain chole kai

Than gai hai is liye taqdir aur tadbir mein

hath to har ek ke do hain aur gul-daste kai

baat qismat ki nahin dil tha hawas-na-ashna

warna hum ko bhi mile the kaam ke bande kai

qurbaton se faslon ko his ki bedari mili

jism-o-jaan ke darmiyan aae nazar parde kai

bhiD mein aise ghire ki baDh gain tanhaiyan

sath hi lekin hue aabaad virane kai

lab pe halki si hansi aur qalb Danwa-Dol hai

rah mein kabe ke paDte hain sanam-KHane kai