ek ek lamha mujhe zist se be-zari hai

ek ik lamha mujhe ziist se be-zārī hai

merī har saañs sulagtī huī chingārī hai

kyā hī aurāq musavvar haiñ kitāb-e-dil ke

ḳhūn-e-armāñ se har ik safhe pe gul-kārī hai

zaḳhm hī zaḳhm haiñ āñkhoñ se lagā kar dil tak

soch meñ huuñ ki ye kis qism kī dildārī hai

ye simaTte hue saa.e ye larazte dar-o-bām

ik na.ī sub.h ke e'lān kī tayyārī hai

har qadam par nazar aate haiñ salīboñ ke sutūn

ye koī ḳhvāb hai yā ālam-e-bedārī hai

kyuuñ uTheñ paañv junūñ ke sū-e-manzil 'sādiq'

ek ik gaam salāsil kī girāñ-bārī hai

ek ek lamha mujhe zist se be-zari hai

meri har sans sulagti hui chingari hai

kya hi auraq musawwar hain kitab-e-dil ke

KHun-e-arman se har ek safhe pe gul-kari hai

zaKHm hi zaKHm hain aankhon se laga kar dil tak

soch mein hun ki ye kis qism ki dildari hai

ye simaTte hue sae ye larazte dar-o-baam

ek nai subh ke e'lan ki tayyari hai

har qadam par nazar aate hain salibon ke sutun

ye koi KHwab hai ya aalam-e-bedari hai

kyun uThen panw junun ke su-e-manzil 'sadiq'

ek ek gam salasil ki giran-bari hai