ek ishaare mein badal jata hai maiKHane ka nam

ek ishāre meñ badal jaatā hai maiḳhāne kā naam

chashm-e-sāqī terī gardish se hai paimāne kā naam

pahle thā mauj-e-bahārāñ dil ke lahrāne kā naam

maskan-e-barq-e-tapāñ hai ab to kāshāne kā naam

aas jis kī ibtidā thī yaas jis kī intihā

ai dil-e-nākām kyā ho aise afsāne kā naam

rañg lā kar hī rahā āḳhir mohabbat kā asar

aaj to un kī zabāñ par bhī hai dīvāne kā naam

āsmāñ par barq gulshan meñ sabā dariyā meñ mauj

jis jagah dekho nayā hai zulf lahrāne kā naam

maut ho yā vo hoñ donoñ haiñ ilāj-e-dard-e-dil

vā-e-qismat ek bhī letā nahīñ aane kā naam

zulf-e-mushkīñ lāla-ruḳh gul-pairahan mast-e-bahār

mausam-e-gul hai tumhāre baam par aane kā naam

ishq kī tasvīr kā ye dūsrā ruḳh hai 'vaqār'

sham.a jaltī hai magar hotā hai parvāne kā naam

ek ishaare mein badal jata hai maiKHane ka nam

chashm-e-saqi teri gardish se hai paimane ka nam

pahle tha mauj-e-bahaaran dil ke lahrane ka nam

maskan-e-barq-e-tapan hai ab to kashane ka nam

aas jis ki ibtida thi yas jis ki intiha

ai dil-e-nakaam kya ho aise afsane ka nam

rang la kar hi raha aaKHir mohabbat ka asar

aaj to un ki zaban par bhi hai diwane ka nam

aasman par barq gulshan mein saba dariya mein mauj

jis jagah dekho naya hai zulf lahrane ka nam

maut ho ya wo hon donon hain ilaj-e-dard-e-dil

wa-e-qismat ek bhi leta nahin aane ka nam

zulf-e-mushkin lala-ruKH gul-pairahan mast-e-bahaar

mausam-e-gul hai tumhaare baam par aane ka nam

ishq ki taswir ka ye dusra ruKH hai 'waqar'

shama jalti hai magar hota hai parwane ka nam