ek jaise hain zamane ke pareshan-surat

ek jaise haiñ zamāne ke pareshāñ-surat

vahī vīrāni-e-dil aur vahī vīrāñ sūrat

muntazir baiThe haiñ ik umr se ham tīra-nasīb

shāyad aa jaa.e koī shaam charāġhāñ-sūrat

kab talak dekhiye is ziist ke ā.īne meñ

vahī tanzīl-e-havādis vahī hairāñ sūrat

ne.amateñ jab huiiñ taqsīm sar-e-roz-e-azal

ek gulshan milā ham ko bhī bayābāñ-sūrat

ham ne aise bhī chaman dekhe haiñ is aalam meñ

fasl-e-gul meñ jo nazar aa.eñ zamistāñ-sūrat

rind-e-be-fikr kī mānind phire āvāra

vahī afsurdagi-e-dil vahī ḳhandāñ-sūrat

ham ye kis kārgah-e-shīshagarāñ ke haiñ asiir

jahāñ har banda nazar aatā hai yazdāñ-sūrat

zinda rahne ke hunar ham ne vahīñ se sīkhe

dard bhī ham ko milā vo jo hai darmāñ-sūrat

kisht-e-jāñ tishna hai ik umr se shāyad koī

abr aa jaa.e idhar dīda-e-bārāñ sūrat

haram-o-dair kī rāhoñ se shanāsā haiñ 'urūj'

ham ne kāfir bahut dekhe haiñ musalmāñ-sūrat

ek jaise hain zamane ke pareshan-surat

wahi virani-e-dil aur wahi viran surat

muntazir baiThe hain ek umr se hum tira-nasib

shayad aa jae koi sham charaghan-surat

kab talak dekhiye is zist ke aaine mein

wahi tanzil-e-hawadis wahi hairan surat

neamaten jab huin taqsim sar-e-roz-e-azal

ek gulshan mila hum ko bhi bayaban-surat

hum ne aise bhi chaman dekhe hain is aalam mein

fasl-e-gul mein jo nazar aaen zamistan-surat

rind-e-be-fikr ki manind phire aawara

wahi afsurdagi-e-dil wahi KHandan-surat

hum ye kis kargah-e-shishagaran ke hain asir

jahan har banda nazar aata hai yazdan-surat

zinda rahne ke hunar hum ne wahin se sikhe

dard bhi hum ko mila wo jo hai darman-surat

kisht-e-jaan tishna hai ek umr se shayad koi

abr aa jae idhar dida-e-baran surat

haram-o-dair ki rahon se shanasa hain 'uruj'

hum ne kafir bahut dekhe hain musalman-surat