ek kaif-o-masti ki zindagi hai shishe mein

ek kaif-o-mastī kī zindagī hai shīshe meñ

kis ne mai nigāhoñ kī Dhaal dī hai shīshe meñ

kaun ab tasallī de kaun mere kaam aa.e

jab hayāt ḳhud merī Dhal ga.ī hai shīshe meñ

ġham-nigāh kyā jaane āñsuoñ ke Dhalne se

raushnī tabassum meñ dilkashī hai shīshe meñ

nuqra.ī tabassum meñ kaifiyat hai naġhmoñ kī

jhūmte haiñ paimāne naġhmagī hai shīshe meñ

itne kyoñ pareshāñ ho sāġhar-e-shikasta se

zindagī kī rā'nā.ī aaj bhī hai shīshe meñ

ahl-e-aql-o-dānish kī baat ye agar sach hai

be-ḳhudī hai baade meñ āgahī hai shīshe meñ

baat ishq-o-mastī kī maiñ ne chheḌ dī 'anvar'

sāgaroñ meñ sahbā hai shā'irī hai shīshe meñ

ek kaif-o-masti ki zindagi hai shishe mein

kis ne mai nigahon ki Dhaal di hai shishe mein

kaun ab tasalli de kaun mere kaam aae

jab hayat KHud meri Dhal gai hai shishe mein

gham-nigah kya jaane aansuon ke Dhalne se

raushni tabassum mein dilkashi hai shishe mein

nuqrai tabassum mein kaifiyat hai naghmon ki

jhumte hain paimane naghmagi hai shishe mein

itne kyon pareshan ho saghar-e-shikasta se

zindagi ki ra'nai aaj bhi hai shishe mein

ahl-e-aql-o-danish ki baat ye agar sach hai

be-KHudi hai baade mein aagahi hai shishe mein

baat ishq-o-masti ki main ne chheD di 'anwar'

sagaron mein sahba hai sha'iri hai shishe mein