ek main aur itne lakhon silsilon ke samne

ek maiñ aur itne lākhoñ silsiloñ ke sāmne

ek saut-e-gung jaise gumbadoñ ke sāmne

miTte jaate naqsh dūd-e-dam kī aamad raft se

khulte jaate be-sadā lab ā.inoñ ke sāmne

hai havā-e-sair-e-āb aur ajnabī sī sar-zamīñ

uḌ rahī hai ḳhāk-e-kohna sāhiloñ ke sāmne

aag jaltī hai gharoñ meñ yā koī tasvīr hai

yādgār-e-jurm-e-ādam ḳhākiyoñ ke sāmne

dushmanī rasm-e-jahāñ hai dostī harf-e-ġhalat

aadmī tanhā khaḌā hai zālimoñ ke sāmne

chaar chup chīzeñ haiñ bahr-o-bar falak aur kohsār

dil dahal jaatā hai in ḳhālī jag.hoñ ke sāmne

bātin-e-zardār pur-asrār hai jaise 'munīr'

kān-e-zar kī band haibat mash.aloñ ke sāmne

ek main aur itne lakhon silsilon ke samne

ek saut-e-gung jaise gumbadon ke samne

miTte jate naqsh dud-e-dam ki aamad raft se

khulte jate be-sada lab aainon ke samne

hai hawa-e-sair-e-ab aur ajnabi si sar-zamin

uD rahi hai KHak-e-kohna sahilon ke samne

aag jalti hai gharon mein ya koi taswir hai

yaadgar-e-jurm-e-adam KHakiyon ke samne

dushmani rasm-e-jahan hai dosti harf-e-ghalat

aadmi tanha khaDa hai zalimon ke samne

chaar chup chizen hain bahr-o-bar falak aur kohsar

dil dahal jata hai in KHali jaghon ke samne

baatin-e-zardar pur-asrar hai jaise 'munir'

kan-e-zar ki band haibat mashalon ke samne