ek manzar kahkashani ek KHat-e-bar-ab bhi

ek manzar kahkashānī ik ḳhat-e-bar-āb bhī

zindagī bālā-nashīnī bhī kamand-e-ḳhvāb bhī

kuchh junūñ kī sarfaroshī kuchh ḳhirad kā bāñkpan

varna hai uzv-e-muattal ālam-e-asbāb bhī

duur sāhil se tamāshā dekhte rahte haiñ log

kashtiyāñ hotī haiñ zer-e-āb bhī ġharqāb bhī

ḳhastagī meñ tujh se kyā shikva ki ai jān-e-murād

is bulandī se nazar aate nahīñ ahbāb bhī

dil bhī lag jā.egā mushkil sahl bhī ho jā.egā

kār-e-duniyā meñ milā deñ kār-e-pech-o-tāb bhī

apnī dhun par lahlahānā kisht-e-jāñ kī ḳhāsiyat

mausamoñ ke darmiyāñ tishna bhī hoñ sairāb bhī

us nazar kī shoḳhiyoñ ne lā-ubālī kar diyā

us kī nazroñ ne sikhā.e shauq ke ādāb bhī

farq itnā hai ki hairāñ ho ke rah jaatī hai aañkh

aag barsātā thā pahle dīda-e-shādāb bhī

tairne joḌe batoñ ke ab yahāñ aate nahīñ

gaañv meñ paanī se ḳhālī ho gayā tālāb bhī

tere jalvoñ ne miTāyā imtiyāz-e-roz-o-shab

dekhtā huuñ māh-e-nau bhī mehr-e-ālam-tāb bhī

maiñ thā nā-ma.alūm shai thī dīda-e-hairān thā

aise manzar se qarīñ thā mauja-e-sailāb bhī

shā.irī kyā hai 'amīn-ashraf' navā-e-barg ne

ishq-nāma bhī ġhazal bhī āsmāñ mehrāb bhī

ek manzar kahkashani ek KHat-e-bar-ab bhi

zindagi baala-nashini bhi kamand-e-KHwab bhi

kuchh junun ki sarfaroshi kuchh KHirad ka bankpan

warna hai uzw-e-muattal aalam-e-asbab bhi

dur sahil se tamasha dekhte rahte hain log

kashtiyan hoti hain zer-e-ab bhi gharqab bhi

KHastagi mein tujh se kya shikwa ki ai jaan-e-murad

is bulandi se nazar aate nahin ahbab bhi

dil bhi lag jaega mushkil sahl bhi ho jaega

kar-e-duniya mein mila den kar-e-pech-o-tab bhi

apni dhun par lahlahana kisht-e-jaan ki KHasiyat

mausamon ke darmiyan tishna bhi hon sairab bhi

us nazar ki shoKHiyon ne la-ubaali kar diya

us ki nazron ne sikhae shauq ke aadab bhi

farq itna hai ki hairan ho ke rah jati hai aankh

aag barsata tha pahle dida-e-shadab bhi

tairne joDe baton ke ab yahan aate nahin

ganw mein pani se KHali ho gaya talab bhi

tere jalwon ne miTaya imtiyaz-e-roz-o-shab

dekhta hun mah-e-nau bhi mehr-e-alam-tab bhi

main tha na-malum shai thi dida-e-hairan tha

aise manzar se qarin tha mauja-e-sailab bhi

shairi kya hai 'amin-ashraf' nawa-e-barg ne

ishq-nama bhi ghazal bhi aasman mehrab bhi