ek muddat se mere ghar mein na aaya koi

ek muddat se mire ghar meñ na aaya koī

phir bhī āñgan meñ nazar aatā hai saayā koī

mujh ko ik zaḳhmī parinde kā ḳhayāl aatā hai

shāḳh se TuuT ke uḌtā hai jo patta koī

log ghabrā ke nikal aa.e haiñ maidānoñ meñ

habs aisā hai ki aatā nahīñ jhoñkā koī

be-ḳhabar vaqt ke dhāre pe bahe jaate haiñ

kyā ḳhabar kaun sī manzil pe hai pahuñchā koī

rang kyā kyā na samā.e haiñ mirī āñkhoñ meñ

sūrat-e-naqsh magar dil meñ na utrā koī

jo mirī ruuh ke zaḳhmoñ kā mudāvā le 'zamān'

mujh ko is shahr meñ miltā nahīñ aisā koī

ek muddat se mere ghar mein na aaya koi

phir bhi aangan mein nazar aata hai saya koi

mujh ko ek zaKHmi parinde ka KHayal aata hai

shaKH se TuT ke uDta hai jo patta koi

log ghabra ke nikal aae hain maidanon mein

habs aisa hai ki aata nahin jhonka koi

be-KHabar waqt ke dhaare pe bahe jate hain

kya KHabar kaun si manzil pe hai pahuncha koi

rang kya kya na samae hain meri aankhon mein

surat-e-naqsh magar dil mein na utra koi

jo meri ruh ke zaKHmon ka mudawa le 'zaman'

mujh ko is shahr mein milta nahin aisa koi